ಎಲ್ಲರಿಗೂ ದುರ್ಮುಖಿ ಸಂವತ್ಸರದ ಶುಭಾಶಯಗಳು.
ಸಂವತ್ಸರ ಎಂದರೆ ಏನು, ಅದರ ಹಿನ್ನೆಲೆ ಏನು ಅನ್ನೋದಕ್ಕೆ ಈ ಪುಟ ಒಮ್ಮೆ ನೋಡಿ. ಸಂವತ್ಸರದ ಪಟ್ಟಿ ಬೇಕಾದರೆ ನಮ್ಮ ವಿಕಿ ಹೇಳ್ತಾನೆ, ಓದಿಕೊಳ್ಳಿ
ಸಂವತ್ಸರಗಳ ನಾಮಜಪ ಬಿಟ್ಟು ಮುಂದೆ ಬರೋಣ.
ಈಗ ತಾನೇ ವರ್ಷಾಂತ್ಯದ ಬೇಯುವಿಕೆಯಲ್ಲಿ ಅಥವಾ ಮಕ್ಕಳ ಪರೀಕ್ಷೆ ಬಿಸಿಯಲ್ಲಿ ಬೆಂದಿದ್ದೀವಿ, ತಲೆಗೆ ಎಣ್ಣೆ ಹಚ್ಚಿಕೊಂಡು ಹಂಡೆ ಬಿಸಿ ನೀರಿನಲ್ಲಿ ಮಂಡೆ ಬಿಸಿ ಮಾಡಿಕೊಳ್ಳಿ. ಮಾವಿನ ತೋರಣ ಕಟ್ಟಿದ್ದೀರೆಂದು ನಂಬಿದ್ದೇವೆ. ಆಮೇಲೆ ಈ ವರ್ಷವನ್ನೂ ಕಳೆದ ವರ್ಷಗಳಂತೆಯೇ ಬಂದಂತೆ ಸ್ವೀಕರಿಸುತ್ತೇವೆ ಎಂದು ಹೇಳಿಕೊಂಡು ಬೇವು ಬೆಲ್ಲ ತಿನ್ನಿ. ಬೇವಿನ ಹೂ, ಎಲೆಗಳನ್ನು ಬಿಸಾಡಿ ಬರೀ ಬೆಲ್ಲ ತಿಂದು ಸುಖವನ್ನೇ ಬಯಸಿದರೆ ನಾವು ಜವಾಬ್ದಾರರಲ್ಲ. ಬಹುಶಃ ಎಲ್ಲರಿಗೂ ರಜೆ ಇದೆ (ನನಗಿಲ್ಲ, ಅದಕ್ಕೆ ಬಹುಶಃ ಎಂದಿದ್ದು), ಮೂರ್ಖರ ಪೆಟ್ಟಿಗೆ / ದೂರದರ್ಶನದ ಪ್ರತೀ ವಾಹಿನಿಯಲ್ಲೂ ನೀವು ಭಯಭೀತರಾಗುವ ಜ್ಯೋತಿಷ್ಯ ಬರುತ್ತದೆ, ಕೇಳಿ ಸ್ವಲ್ಪ ಸೀರಿಯಸ್ ಆಗಿ ತಲೆ ಕೆಡಿಸ್ಕೊಳಿ. ಆ ನಂತರ ಬೇರೆ ಇನ್ನೇನು ಮಾಡೋದು, ಅದೇ ವಾಹಿನಿಯಲ್ಲೇ ಸಂತೆಗಳು / ಜಾತ್ರೆಗಳು / ಯುಗಾದಿ ವಿಶೇಷಗಳು ಅಂತೆಲ್ಲಾ ಯಾವೋ ಕಾರ್ಯಕ್ರಮಗಳು ಬರುತ್ತವೆ. ನೋಡಿ - ಯಾವುದನ್ನೂ ತಲೆಗೆ ಹಚ್ಕೋಬೇಡಿ (ಈಗಾಗಲೇ ಭವಿಷ್ಯದ ಹುಳ ನಿಮ್ಮ ತಲೆಯಲ್ಲಿರುತ್ತದೆ). ಜಾಹೀರಾತು(ಥು)ಗಳ ಮಧ್ಯೆ ಕಾರ್ಯಕ್ರಮ ನೋಡುವಾಗ ಬೇಜಾರೂ ಆಗುವಷ್ಟರಲ್ಲಿ ......... ಊಟದ ಸಮಯ. ನೆಮ್ಮದಿಯಾಗಿ ಊಟ ಮಾಡಿ. ಸಾದ್ಯವಾದರೆ ಊಟದ ನಂತರ ಒಂದು ನಿದ್ದೆ ಮಾಡಿ.
ಯಪ್ಪಾ... ಗೊತ್ತಿರೋದನ್ನೇ ಎಷ್ಟು ಕೊರೀತಿದಿಯೋ ಅಂತಿದ್ದೀರಾ... ಹೊರಟೆ.. ಹೊರಡೋ ಮುಂಚೆ ಇನ್ನೊಂಚೂರು...
ನನಗೆ ಹೊಸ ವರ್ಷ, ಯುಗಾದಿ, ನನ್ನ ಹುಟ್ಟು ಹಬ್ಬ ಎಲ್ಲಾ ರಜ ತೊಗೊಳೋಕ್ಕೆ ಕಾರಣಗಳು ಅಷ್ಟೇ. ಭವಿಷ್ಯವನ್ನು ನೋಡುತ್ತೇನೆ ನಂಬುವುದಿಲ್ಲ. ನಮ್ಮ ಯೋಗ್ಯತೆ ನಮಗೆ ಗೊತ್ತಿರುವಾಗ ಯಾವ ಯೋಗ ನಮಗೆ ಏನು ಮಾಡುತ್ತೆ ಹೇಳಿ ?
